AaratiLibraryNepali Documents
श्रित-कमला आरती – Aarati
श्रित-कमला-कुच-मण्डल धृत-कुण्डल ए
कलित-ललित-वन-माल जय जय देव हरे
दिन-मणि-मण्डल-मण्डन भव-खण्डन ए
मुनि-जन-मानस-हंस जय जय देव हरे
कालिय-विष-धर-गञ्जन जन-रञ्जन ए
यदुकुल-नलिन-दिनेश जय जय देव हरे
मधु-मुर-नरक-विनाशन गरुडासन ए
सुर-कुल-केलि-निदान जय जय देव हरे
अमल-कमल-दल-लोचन भव-मोचन ए
त्रिभुवन-भवन-निदान जय जय देव हरे
जनक-सुता-कृत-भूषण जित-दूषण ए
समर-शमित-दश-कण्ठ जय जय देव हरे
अभिनव-जल-धर-सुन्दर धृत-मन्दर ए
श्री-मुख-चन्द्र-चकोर जय जय देव हरे
तव चरणे प्रणता वयमिति भावय ए
कुरु कुशलं प्रणतेषु जय जय देव हरे
श्री-जयदेव-कवेरिदं कुरुते मुदम्
मङ्गलमुज्ज्वल-गीतं जय जय देव हरे
